اليوم الإثنين 14 أكتوبر 2019 - 8:39 مساءً
أخر تحديث : الأحد 6 أكتوبر 2019 - 8:03 مساءً

بنادمْ كحلْ الرّاسْ…

بتاريخ 6 أكتوبر, 2019 | قراءة

راهْ الدنيا غدّاره

خويا عليك ب الصّبرْ

شحالْ من زيـنْ

زيـنه مدْفـون ف خـرْبه

وشحالْ من ويـلْ

عايش فْ الـقـصرْ

,,,,,,,,,,,,,,,,,,,,,,,,,,,

شي عايشْ هاني

يتمتّـعْ ب رْوايحْ الزهـرْ

أشي عايش مكرفـسْ

مع بْهايمو ، وريحة البْعـرْ

………………………

الصيّاده يْصيّدو

يتمتعوا طولْ النهـارْ

والحْـيّاحه يحيّحـو

يغـوّتوا عـل لّـوحشْ

ويرميـوْا ب الحْجـرْ

,,,,,,,,,,,,,,,,,,,,,,,,

ليك الله يا ليّ محرومْ من الصّغـرْ

لا الميمونْ تـكـعّـدْ

لا الخـيرْ جاهْ ف الكْـبـرْ

إيلا غمّض العينْ تگولْ ناعـسْ

أو قـلبه يكـدي

جمْـره من الجّـمـرْ

العينْ واخا تـشوفْ

يـدّيهْ قـصيره

من شرّ الـفـْـقـر

,,,,,,,,,,,,,,,,,,,,,,,,,

ليك الله أمولْ المْحايـنْ

ثوب ف صابونْ المْصايـبْ

تابْعاه كيفْ طلّـو

مْلازمه العْـمر

,,,,,,,,,,,,,,,,,,,,,,,,,

ليك اللهْ يالي يْعض سْنّـيهْ

مرضْ يعطيهْ ل المرْض

الجّرحْ إلى مْشى يـبْرى

يتحـكْ ب الظفـرْ

,,,,,,,,,,,,,,,,,,,,,,,,

مابيا المكتوبْ لّي مكْـتوب

تهمْـني دْقة بـنادمْ

لّي يزرعْ الشوكْ

ويحْـرقْ المْطامـرْ

حْـكاية الذيبْ إلى جاعْ

أولاّ الكلبْ إلى جاهْ السّعـرْ

,,,,,,,,,,,,,,,,,,,,,,,,

شجـرْتنا اليابْـسه

يا العامْره بْ الشّوك

ما ليك ظلْ

ماتعـتْـقي ب التمـرْ

دْواك شفـتو ف دعْوه

الله يحـفـرْ ليك الجّذرْ

,,,,,,,,,,,,,,,,,,,,,,,,,

شي ناس يطلّو م  الفوقْ

ركّـبو المْخالبْ

ربّاوْ ريش قويّ

إريّـشو بنادمْ فْ السما

كيفْ النـسرْ

,,,,,,,,,,,,,,,,,,,,,,,

كحلْ الراسْ

ياكحـلْ الفعايلْ

يا معشوقْ السّرقه

يوم الصّهـدْ جايك جايك

الى ما كان اليوم

إجيك ف يوم الـحْـشر

,,,,,,,,,,,,,,,,,,,,,,,,

بنادم يا كحل الراس

قلبك مظلامْ

لا نجمه تسْطع ف سْماه

ولا يـتبعو الضّو د الفجـرْ

هْـنيّه عل التنوفـيقْ هْـنيّه

تسبيحْ أو قرأنْ وقلبْ شيطانْ

تركعْ ما تخشعْ

تـبْـدا بْ الضحكه

وتختمْها بْ الغـدرْ

,,,,,,,,,,,,,,

2019زايد التجاني أكتوبر

أوسمة :
error: Content is protected !!