ميدلت بريس – زايد التجاني بومية
شي صْحيح واقـفْ مْبـنـدْ
جْـبل إيطاكي الريحْ
وقطّـر الما من السْحابه
أشي غي مسكينْ
ضعيف.. ضْعفْ من خْـياله
اليّـامو الدّوز طويله سْنيــنْ
مغياره ف حْـوالها.. مجْرابه
…………………….
ضاع الحق والتّـرفعْ الميزانْ
المْحاين هاجْـمه الدّق البيـبانْ
لي وْقف ف طريقها تكـنْسو
من تمّه ل قاعْ البحر
ب الما والشطّابه
…………………..
نوصيك يا لي عْـشه ف الشجره
أوخايف طّيْـرو ليهْ الريحْ
الخطوه : خطوة رجْليـكْ
أتحـزّمْ من دبا
الغابه لا تْخلعكْ وْحوشها
الناس الى بغاتْ تحْطب
سرّجْ خيـلك أشدْ لجامْـها
أو حطبْ مع الحْطّابه
…………………
رفعْ راسك ويّاك الظلمْ
الظلم والبردْ راهم خْوات
إمص ليـكْ الدّم وانخـرْ العضام
الى حشمْـتي ف الصّوفْ
أو جتيهْ ب قْـشّابه
…………………
نوصيك يا لي رزقه تحتْ لارضْ
توگض أونبش ب ظفاركْ
الرّجْله ف الفـعايـلْ
لي زرّبْ تحصّنْ
أو لي عندو المْنـاولْ
إفرّشْ طريقو بْ الزرابى
…………………..
كحـلْ الراس يا قـليلْ النـيّه
عليكْ ب الصّفا والنيه
لي حـرْث ف الخْـريف
يفـرحْ ب الصّابه
الزينْ يـبقى ديـما زينْ
مايسْترو لـثـامْ ولا جْلابه
…………………..
البحرْ الغـارقْ
يغوص فيه العْـوّامه
كلامي مرصّع ب شلّى مْطارق
مْعـاني خْلاّبه
يْـذوقها الفوهامه
قليلْ الشّانْ يحـرّْكو الغْـنا
ويعطي الغرامه
بالحق ، الجّامي
تحرّكو الكْــتابه
…………………..
مولْ العقل فيه الفايْـده
شهْـده م العسلْ
أمول الكرشْ
عـرْمه د اللّحـمْ
غير بارْكه
ف قهْـوه ولّا محْلابـه
غيومْ النّايـر ب الخيرْ مـدْراره
أسْحابة الصيفْ
واشْ حتى هي سْحابه؟
…………………………………
عذراً التعليقات مغلقة