زجل :مغربْ اليوومْ

 ميدلت بريس : بقلم أ. زايد التجاني / بومية

مْشيت ل الطبيب إداوي حالي

إذهبْ الباسْ

ب شي كينه وْلا سيرو

ساعه لقيتْ جوقه د الناسْ

لا راديو لا تلفزه

غيرْ الكْـراسى والبيرو

جاهدْ أقلبي واصْبر

سيرْ تسنى وارتاحْ

راهْ الراحه تنفعْ الراسْ

أحقْ المسكين الدّاهْ غيرو

حْـليلي ها الطبيبه جاتْ

بعدما شبعاتْ نعاسْ

أجي انت وانتي

أنتومه سيرو

ماعندنا ما نديرو

سيرو لفاس ألا مكناسْ

الشفاره عندنا ب لوانْ الطيفْ

هالي ب كاطكاط أوكرافاطا

انت مولْ الخير

ها لي الحكْـمه عندو ف الستيلو

ها مولْ الكْـلاطا والزرواطا

أولّي هدرْ

إتحـزْ ليهْ الراسْ

الله الله عليكْ أ المغربْ

زيرو عْـلى زيرو

الفرّانْ صغيرْ ألحومه كْـبيره

ألخبّاز معـمّـر سْواقه

أطبـسيلنا حْـنا قديم أمتقوبْ

مافيه غير العظامْ

إلى ماجات ف النابْ

تجيك ف الضراسْ

خْساره يالعربْ خساره

ما بْقى شرعْ الله

ما درْنا بْحال النصارى

مشى الحق أغابْ الدين

تهد الساسْ

إديرها زمانْ التشويكه والشيشه

والقرْعه والكاسْ

نوصيكْ آ المْـرا لا تْـولدي

مغرب اليوم

ماكاينْ ما يعجبْ

خلّي جيلك راكدْ

القهْره والحكره ..راها تسنّى

والباله والفاسْ

أ. زايد التجاني / بومية